DC MAYEKA “HAKIKISHENI MAMBO YOTE YALIYOSALIA MNAYAKAMILISHA”

Imewekwa: October 10th, 2023

Mkuu wa wilaya ya Chunya Mhe. Mayeka  S.Mayeka  ameutaka uongozi wa shule ya msingi  Nyerere ambao ndio wasimamizi wa ujenzi wa shule mpya Mzalendo kuhakikisha mambo madogo madogo yaliyosalia katika ujenzi wa shule ya awali na Msingi Mzalendo yanakamilika  kwa  wakati ili shule ianze mapema kama matarajio ya serikali.

Maagizo hayo ameyatoa tarehe  9/10/2023 wakati alipotembelea na kukagua mradi wa ujenzi wa shule mpya ya Msingi na awali ya Mzalendo  iliyojengwa katika kitongoji cha Ntankini kata ya Makongolosi ambapo ujenzi wa Shule hiyo umekamilika  yamesalia mambo madogo madogo  ya kukamilisha.

“Hakikisheni mnarekebisha sehemu zote ambozo nimewataka kurekebisha   yakiwemo madawati , madirisha ya vyoo pamoja  na kusawazisha maeneo yote yanayoizunguka shule kabla ya kuanza kwa msimu wa mvua  tafuteni hata wadau watakaoweza kuwasaidia greda kwaajili ya kusawazisha maeneo mbalimbali yanayozunguka shule “ alisema Mhe. Mayeka.

Aidha Mhe. Mayeka ameutaka Uongozi wa shule kuacha kuwalipa Mafundi pesa yote kabla kazi haijakamilika kwani kwa kufanya hivyo inasabaisha baadhi ya  mafundi kuto kufanya kazi zao   kwa ubora  na ufanisi  lakini pia  ameagiza Mafundi ambao bado hawajakamilisha kazi zao  wahakikishe wanazikamilisha  kama ilivyokusudiwa.

Mwalim Mkuu msaidizi  wa Shule ya Msingi Nyerere Ndugu Gwantwa Mwasomola akitoa  maelezo juu ya hatua zilizofikiwa katika ujenzi wa shule ya awali na Msingi Mzalendo amesema  ujenzi umekamilika  yamesalia mambo madogo madogo ambayo mafundi wanaendelea kuyakamilisha  ikiwa ni pamoja na kufunga milango , kupaka rangi baadhi ya sehemu chache zilizosalia  pamoja na madawati.

Mwalim Gwantwa pia amekiri kuyapokea maagizo yote yaliyotolewa na mkuu wa Wilaya na kuahidi  kuyafanyia kazi ikiwa ni pamoja na kumuita fundi aliyetengeneza madawati na kuhakikisha anayarekebisha madawati hayo  kwa viwango vinavyotakiwa kulingana na muongozo aliopewa.

‘’Maagizo yote na maelekezo tumeyapokea na tutayafanyia kazi kwani Mafundi wetu wote wapo  tutahakikisha wanakamilisha kazi zao  lakini pia kwa maeneo yanayohitaji marekebisho tutayarekebisha kama ambavyo tumepokea maelekezo”  alisema Gwantwa

Shule ya awali  na  Msingi Mzalendo  ni miongoni mwa shule mpya zilizojengwa   katika halmashauri ya Wilaya ya Chunya kupitia mradi wa BOOST  kwa lengo la kuboresha sekta ya  Elimu  Nchini , shule hii inatarajiwa kuhudumia watoto wanaotaka maeneo mbalimbali katika kata ya Makongolosi.

Mkuu wa wilaya ya Chunya akiendelea na ukaguzi wa ujenzi wa shule Mpya ya Msingi na awali inayoyojengwa Kata ya Makongolosi Chunya

Mkuu wa Wilaya Mhe Mayeka akikagua madawati yaliyowekwa ndani ya Madarasa ya shule ya Msingi Mpya inayojengwa Kata ya Makongolosi

Mkuu wa wilaya ya Chunya akikagua vyoo vinavyojengwa kwenye shule ya Msingi mPya inayojengwa kata ya Makongolosi