WANAFUNZI WA SEKONDARI WAPATIWA ELIMU YA LISHE, CHUNYA

Imewekwa: October 18th, 2023

Afisa lishe wa Halmashauri ya Wilaya ya Chunya ndugu Simon Mayala  amewataka wanafunzi na wanachunya kwa ujumla kubadili namna ya ulaji wa vyakula ili kuepukana na changamoto mbalimbali zinazotokana na ulaji mbaya, na kushauri umuhimu wa kuzingatia lishe bora huku akisisitiza kwamba lishe bora ni kupata mlo kamili na sio kushiba kama ilivyozoeleka kwa jamii nyingi ikiwepo wanafunzi ambao baadaye ndio Taifa la Kesho.

Hayo ameyasema leo 18/10/2023  kwa nyakati tofauti  katika viwanja vya shule ya Sekondari Kiwanja  na Shule ya sekondari ya kata Itewe alipokuwa akitoa elimu ya Lishe ikiwa ni mwendelezo wa Kampeni ya lishe vijana balehe  kitaifa  yenye lengo la kutoa elimu ya lishe kwa vijana  na namna bora ya ulaji  unaozingatia afya.

‘’Lishe bora inaanza na namna ya ulaji kwani lishe bora sio kula na kushiba   hivyo vijana kama taifa la kesho tunapaswa kuzingatia namna ya ulaji bora kutokana na changamoto mbalimbali za kiafya zinazotokana na ulaji mbaya  kwani kumekuwa na wimbi kubwa la magonjwa ya moyo hii yote  ni kutokana na vyakula tunavyo vitumia’’ alisema Mayala

Mayala ameongeza  kuwa   vijana wanapaswa kula kwa kuzingatia afya jambo ambalo litasaidia kupunguza changamoto mbalimbali za kiafya kwa kutumia vyakula vinavyolinda mwili na kuwataka kuacha mara moja kula vyakula ambavyo vitawasababishia madhara ya kiafya kwa  baadaye.

Naye Mkuu wa shule ya Sekodari Kiwanja Jackson   Mnyalape amesema kuwa  elimu ya lishe wanoyoipata wanafunzi  ni muhimu kwa maisha yao ya sasa na hata maisha yao ya baadaye kwani itawasaidia hata kwa baadae watakapokuwa watu wazima na familia zao  hivyo elimu hiyo ni muhimu sana kwao  lakini pia watakuwa mabalozi wazuri hata watakapo rudi majumbani mwao.

Dorah Daniel, Isack Sajire kutoka shule ya sekondari kiwanja  na Norberth Mawazo pamoja na Anastazia Ndede wa shule ya sekondari ya kata Itewe  wamesema kuwa elimu ya lishe walioipata itawasaidia kupunguza au kuacha kula vyakula ambavyo vitawasababishia changomoto za kiafya kwa baadaye lakini pia  upimaji wa hali ya lishe umewasaidia kujua hali zao za lishe  na kujua wanatakiwa kufanya nini ili kuboresha zaidi hali zao za  lishe.

Kampeni ya lishe vijana balehe yenye kauli mbiu ’Lishe kwa Vijana Balehe , Chachu ya Mafanikio yao”imehitimishwa rasmi leo tarehe 18/10/2023 katika halmashauri ya wilaya ya Chunya, na  ilianza  tarehe 16/10/2023. Kampeni imefikia Shule za sekondari Isenyela, Kiwanja na Itewe ambapo wanafunzi 756 wamepima hali zao za Lishe wakati wa Kampeni hiyo, Kampeni hiyo imehusisha Maafisa elimu Sekondari Halmashauri ya wilaya ya Chunya, Wauuguzi kutoka hospitali ya Wilaya ,walimu pamoja na Wanafunzi

Afisa lishe wa Halmashauri ya Wilaya ya Chunya ndugu Simon Mayala akifafanua jambo wakati wa mafunzo ya Lishe kwa wanafunzi hasa Rika Balehe, Hapo ni shule ya Sekondari Kiwanja

Wanafunzi wa Shule ya Sekondari ya kata Itewe wakiwa katika utulivu wakati wakipatiwa elimu ya Lishe na Maafisa toka ofisi za elimu, na wataalamu wa lishe

Wanafunzi wa Shule ya Sekondari Kiwanja wakipata elimu ya Lishe kutoka kwa wataalamu wa Lishe

Wataalamu wa Lishe kutoka Halmashauri ya wilaya Chunya wakishirikiana na wanafunzi kupima urefu wao na uzito ili kutathimini hali ya lishe

Kazi ikiendelea ya upimaji wa urefu sambamba na uzito ili kutathimini hali ya lishe kwa mlengwa