WALIMU WAASWA KUWA WAZALENDO

Imewekwa: January 29th, 2018

Chunya
Mwenyekiti wa Tume ya Utumishi wa walimu Taifa Oliver Mhaiki amewata walimu wilayani hapa kuwa wazalendo,kwa kutenda matendo yaliyo mema kwenye jamii inayowazunguka  na wanafunzi wanaowafundisha ili kuendana na dhana ya Ualimu.

Mhaiki aliyasema  haya wakati akizungumza na wakuu wa Shule za Msingi na Sekondari pamoja na waratibu Elimu kata, katika ziara yake ya  kutembelea walimu mkoani Mbeya ambayo ameinzia katika  Halmshauri ya  wilaya Chunya ikiwa na lengo la kukumbusha  majukumu ya walimu pamoja na waajiri ili kuhakikisha adhma ya Serikali ya kuanzisha Chombo hicho inatimia na Elimu bora inatolewa kwa wakati na ufanishi  kwa watoto.

Alisema Tume ya utumishi wa walimu kama chombo kinachotambulika kitaifa kilianzishwa kwa nia ya kuwasaidia walimu,  hii ni kutokana na wingi walionao ambapo asilimia 60 ya wafanyakazi wote nchini ni walimu.

Aidha aliwasihi walimu kuhakikisha wanawajibika kwa nafasi zao na mwajiri kuhakikisha Walimu wanatoa huduma kwa ufanisi, weledi na kwa wakati  ili  Elimu bora  iendelee kutolewa kwa watoto  kwa maendeleo ya Taifa letu.

 Aidha alisisitiza suala la kujituma na  ushirikiano  kati ya Walimu na waajiri  pamoja na mamlaka  za  nidhamu ili kuhakikisha huduma zinatolewa kwa unyenyevu ili kuinua kiwango cha Elimu nchini.

Aidha ofisa Elimu mkoa Paulina Ndigeza  akizungumza katika kikao hicho aliwapongeza walimu kwa kufanya kazi nzuri ya kufundisha licha ya kuwepo kwa changamoto mbalimbali ikiwemo uchache wa walimu ambayo alidai inaendelea kufanyiwa kazi kwani si muda mrefu Serikali itaajiri walimu wapya.

                                                                           
Mwenyekiti wa Tume ya Utumishi wa Walimu Taifa Oliver Mhaiki akizungumza na walimu wilayani Chunya kuhusu Maadili ya Utumishi bora.

                                                                     Afisa Elimu Mkoa Bi. Paulina Ndigeza akizungumza na Walimu wilayani Chunya.

Baadhi ya walimu wakiwa wametulia wakimfuatilia kwa makini Mwenyekiti wa tume ya utumishi wa walimu wakati akiwakumbusha maadili ya utumishi wa umma

                              Mwenyekiti wa Halmashauri Mh. Bosco Mwanginde akiwasihi  walimu kuzingatia mambo yote walioelekezwa.