MH. MWANGINDE “MKAFANYE KAZI KWA UADILIFU”

Imewekwa: September 19th, 2023

Mwenyekiti wa halmashauri ya Wilaya ya Chunya Mhe. Bosco Mwanginde amewataka waajiriwa wapya kufanya kazi kwa uadilifu wanapokuwa katika vituo vyao vya kazi kwa kufuata kanuni, taratibu na miongozo iliyowekwa na serikali  kwasababu wakifanya hivyo watakuwa wametekeleza azma ya serikali ya kuwatumikia wananchi wote bila kujali cheo, jinsi, nafasi na hata kipato cha mtu

Ameyasema hayo 18/09/2023 wakati wa mafunzo kwa waajiriwa wapya walio katika   kada mbalimbali ambazo ni kada ya elimu, afya, utawala na mawasiliano yaliyotelewa katika ukumbi wa halmashauri ya wilaya uliopo jengo jipya la utawala ambapo jumla ya ya waajiriwa 190 wamenufaika na mafunzo hayo.

“Mmeajiriwa  sasa kuwa watumishi wa serikali mkafuate taratibu kanuni na miongozo ya serikali na mkawe wavumilivu  na kukabiliana na changamoto mbalimbali ambazo mtakutana nazo kwa kushirikiana na viongozi kwani serikali inawategemea sana mkafanye kazi kwa uadilifu mkubwa.” Alisema Mhe. Mwanginde

Mhe. Mwanginde  pia amewatahadharisha   waajiriwa wapya kuwa makini na mikopo  kwani inaweza ikawasababisha wakawa na maisha magumu hivyo wanapaswa kujiandaa kabla ya kufanya maamuzi ya kuchukua mikopo  ili mwisho wa siku isije ikawapa shida  wakati wa kurejesha.

Nae Mkurugenzi Mtendaji ndugu Tamim Kambona amewataka waajiriwa wapya hao kuzingatia suala la nidhamu na kujiheshimu  kama watumishi wanapokuwa kazini lakini pia hata katika jamii inayowazunguka  wahakikishe wanashirikiana vizuri na watumishi wenzao katika vituo vya kazi na hata jamii inayowazunguka

Katika semina hiyo elekezi mada mbalimali zimefundishwa ikiwa ni pamoja na haki na wajibu wa mtumishi katika utumishi wa umma , Miiko ya watumishi wa afya , Huduma zinazotolewa na mfuko wa Taifa wa bima ya Afya  pamoja na jinsi ya  kujisajili katika mfumo wa MUKI.

Mafunzo hayo yanafanyika kwa makundi ambapo kundi la kwanza kupata mafunzo hayo ilikuwa kada ya Elimu ambapo walimu 98 walipatiwa mafunzo na kundi la pili limejumuisha kada ya Afya, Utawala na mawasiliano jumla ya waajiriwa ambapo jumla ya watumishi wapya 92 wamepata mafunzo hayo, Na wawezeshaji katika mafunzo hayo ni Maafisa utumishi na utawala, Mganga Mkuu wa wilaya ya Chunya na Afisa kutoka Mfuko  wa Taifa wa Bima ya afya ( NHIF)

Afisa utumishi na rasilimali watu wa Halmashauri ya wilaya ya Chunya Ndugu John Maholani akiwasilisha mada wakati wa Mafunzo elekezi kwa watumishi wa ajira Mpya

Baadhi ya watumishi wa kada mbalimbali (Ajira Mpya) Halmashauri ya wilaya ya Chunya wakifuatilia semina elekezi