DED CHUNYA “SITAKI KUSIKIA SHULE YOYOTE KUNA MWANAFUNZI HAJUI KUSOMA, KUHESABU NA KUANDIKA”.

Imewekwa: January 18th, 2025

Mkurugenzi mtendaji wa Halmashauri ya Wilaya ya Chunya ndugu Tamim Kambona  ametoa rai kwa  walimu Wakuu na Walimu  wa madarasa ya elimu ya awali  kwamba mwaka  huu 2025 hataki kusikia kuna mwanafunzi wa darasa la tatu au darasa  la nne hajui kusoma, kuandika  na kuhesabu katika shule yoyote ile kwani wanafunzi wanapata lishe ya kutosha  wanapokuwa shule  hali inayoongeza umakini  na uwezo mkubwa wa kuwasikiliza walimu wawapo darasani.

Kauli hiyo ameitoa leo tarehe  18/01/2025 wakati akifungua mafunzo kwa walimu wakuu na walimu wanaofundisha madarasa ya awali juu ya njia na Vifaa vya Mtaala wa Elimu ya awali  vilivyoboreshwa kwa walimu kutoka shule 48 za  Halmashauri ya Wilaya ya Chunya yaliyofanyika katika Shule ya Msingi Kibaoni.

“Mwaka huu Sitaki kusikia  katika shule yoyote ile kwamba kuna mwanafunzi  darasa la tatu na darasa  la nne asiyejua kusoma, kuandika na kuhesabu na walimu mpo pale shuleni  mnalipwa mshahara, sitarajii kuona kitu kama hicho  kwani watoto wanapata lishe ya kutosha na wana ubongo mzuri  hivyo wanauwezo  huo, Mwanafunzi anatakiwa atoke darasa la awali akiwa anajua kusoma ,kuandika na Kuhesabu ” amesema Kambona.

Aidha  Kambona amewataka walimu wakuu na Walimu wa elimu ya awali  kusikiliza kwa makini mafunzo yanayotolewa ili wakayafanyie kazi kwenye vituo vyao   kwani mafunzo hayo yatakuwa msaada mkubwa kwao kama walimu na kwa wanafunzi wanaokwenda kuwafundisa katika Shule zao  kwasababu  mafunzo hayo yamelenga njia na Vifaa vya Mtaala wa elimu ya awali ulioboreshwa

Awali akitoa taarifa ya Mafunzo hayo mratibu wa Miradi ya Boost  Wilaya ya Chunya Mwalimu Abdallah Mchelu amesema kuwa lengo la mufunzo hayo ni kuwajengea uwezo  walimu wakuu na walimu wanaofundisha elimu ya awali  juu ya miongozo mbalimbali ya elimu ya awali, ushirikishwaji jamii katika elimu ya awali, upimaji wa elimu ya awali, kutengeneza zana zinazotumika kufundishia na mambo mengine mengi

Mwalimu Mkuu Shule ya Msingi Kibaoni na Mwalimu Jackson Laizer kutoka Shule ya Msingi Nkwangu  kwaniaba ya walimu wengine walioshiriki Mafunzo hayo wamesema mafunzo waliyoyapata yatawasaidia  katika kuandaa zana bora na mbinu za ufundishaji  lakini pia yatawasaidia katika ufundishaji na wanafunzi katika kujifunza  kupitia miongozo mbalimbali iliyotolewa na Serikali .

Mafunzo ya kuhusu njia na Vifaa vya mtaala wa elimu ya awali vilivyoboreshwa nchini  chini ya afua ya mafunzo endelevu  ya walimu kazini (MEWAKA) kupitia mradi wa Boost  yatatolewa kwa siku saba kuanzia tarehe 15/1/2025 na kuhitimishwa tarehe  21/01/2025  kwa walimu wakuu na  na walimu wa elimu ya awali yameanza na Shule za msingi 48 kwa awamu ya kwanza  kati ya shule 90 za halmashauri ya Wilaya ya Chunya.

Mkurugenzi Mtendaji wa Halmshauri ya Wilaya ya Chunya Nndugu Tamim Kambona  akitoa rai kwa walimu wakuu na walimu wa elimu ya awali wakati wa kufungua mafunzo juu ya njia na vifaa vya mtaala wa elimu ya awali vilivyoboreshwa yaliyofanyika Shule ya msingi Kibaoni Wilayani Chunya.

Mwalimu  Mkuu Shule ya msingi Kibaoni Mwl Gloria Ndelwa akieleza namna ambavyo mafunzo hayo yatawasaidia katika kufundisha na kujifunza kwa wanafunzi wa awali.

Mwezeshaji wa kitaifa ndugu Jerome Mwakifuna akiendelea kufundisha maada mbalimbali kwa walimu wakuu na walimu wa elimu ya awali wakati wa mafunzo juu ya njia na na vifaa vya mtaala wa elimu ya awali vilivyoboreshwa.